Жасанды интеллект бүгінде өміріміздің көптеген саласына еніп, білім беру жүйесіне де жаңа мүмкіндіктер ашып отыр. Ол мұғалімнің жұмысын жеңілдетуге, әр баланың жеке қабілеті мен қажеттілігін ескеруге және оқыту сапасын арттыруға көмектеседі. Осы бағытта Абай университеті мен Qazaq AI зерттеу университеті бірлескен бастаманы қолға алды.

2026 жылғы 6 қарашада Qazaq AI зерттеу университетінде екі жоғары оқу орнының өкілдері бас қосып, жасанды интеллект пен педагогиканы біріктіретін жаңа білім беру бағдарламаларын әзірлеуді талқылады. Кездесудің басты мақсаты – болашақ педагогтарды дәстүрлі оқыту әдістерімен қатар, заманауи технологияларды тиімді пайдалануға үйрету. Осы мақсатта университеттер AI+X моделіне негізделген екі бірлескен білім беру бағдарламасын дайындауды жоспарлап отыр.

Мәселен, «Арнайы педагогика және жасанды интеллект» бағдарламасы – ерекше білім беру қажеттіліктері бар балалармен жұмыс істейтін мамандарды даярлауға арналған. ЖИ мен цифрлық технологиялар әр баланың жеке ерекшелігін ескеріп, оған қолайлы оқу ортасын қалыптастыруға атсалысады. Болашақ мамандар интеллектуалды құралдарды пайдаланып, оқыту тәсілдерін жетілдіруді меңгереді.

Екінші бағдарлама – «Мектепке дейінгі білім берудегі интеллектуалды технологиялар». Оның негізгі мақсаты – балабақшадағы білім беру үдерісіне заманауи цифрлық құралдарды енгізу. Студенттер балалардың танымдық қабілеттерін дамытуға арналған инновациялық әдістерді қолдануды және заманауи білім беру ортасын қалыптастыруды үйренеді.

Ал AI+X моделі дегеніміз не? Қарапайым тілмен айтқанда, бұл – жасанды интеллектіні белгілі бір мамандықпен немесе кәсіби саламен біріктіру тәсілі. Мысалы, педагогикада ЖИ оқыту материалдарын дайындауға, балалардың білім деңгейін тексеруге және оқу үдерісін тиімді ұйымдастыруға көмектесе алады. Мұндай білім беру бағдарламалары болашақ мұғалімдерге цифрлық сауаттылықты арттыруға, жаңа технологияларды меңгеруге, сыни ойлауға және кәсіби міндеттерді заманауи әдістермен шешуге мүмкіндік береді. Себебі бүгінгі еңбек нарығында өз мамандығын жақсы білумен қатар, технологияны тиімді пайдалана алатын мамандарға сұраныс артқан.

Абай университеті мен Qazaq AI зерттеу университетінің бұл ынтымақтастығы – педагогикалық білім беруді жаңғырту жолындағы маңызды бастама болып отыр. Екі университеттің ғылыми және академиялық тәжірибесін біріктіру арқылы заманауи талаптарға сай жаңа буын мамандарын даярлауға мүмкіндік туады. Ең бастысы, ЖИ мұғалімді алмастыратын құрал емес, оның жұмысын жеңілдетіп, әр балаға сапалы білім беруге көмектесетін технология болуы керек. Сондықтан болашақ білім беру жүйесінде адам тәжірибесі мен ЖИ мүмкіндіктерінің үйлесімділігі ерекше маңызға ие.

«Abai University» медиа орталығы