03.11.2026
УОРИК УНИВЕРСИТЕТІНІҢ ПРОФЕССОРЫ МИЛИЯ ГЛУХОВИЧ ӨНЕР ФАКУЛЬТЕТІНЕ АКАДЕМИЯЛЫҚ САПАРМЕН КЕЛДІ
2026 жылғы 2 қарашада Абай атындағы Қазақ ұлттық педагогикалық университетінің шақыруымен Ұлыбританияның Уорик университетінің профессоры Милия Глухович Алматыға келді. Ғалымның Өнер факультетіндегі академиялық сапары 2026 жылғы 1 желтоқсанға дейін жоспарланған.
Аталған ғалым Қазақстан Республикасы Ғылым және жоғары білім министрінің 2026 жылғы 21 мамырдағы №242 бұйрығын іске асыру шеңберінде алыс шетелдің жетекші университеттерінен Абай атындағы Қазақ ұлттық педагогикалық университетіне шақырылған шетелдік ғалымдардың бірі болып табылады.
Милия Глухович — театр және перформанс зерттеулері саласының профессоры, Уорик университетінің Театр және перформанс зерттеулері кафедрасының меңгерушісі. Ол 2005 жылы Канаданың Торонто университетінде драма саласы бойынша PhD дәрежесін алған. 2006 жылдан бері Уорик университетінде ғылыми-педагогикалық қызмет атқарып келеді.
Ғалымның ғылыми ізденістері заманауи театр мен перформансты, мәдени жадыны, тарихи тәжірибенің өнердегі көрінісін, көші-қон мен мәдени бірегейлікті, сондай-ақ өнердің қоғамдық үдерістермен байланысын қамтиды. Оның зерттеулерінде жеке және ұжымдық естеліктердің сахналық шығармалар арқылы берілуіне, өнердің өткенді түсіндіру мен мәдени диалог қалыптастырудағы рөліне назар аударылады.
Профессордың негізгі еңбектерінің қатарында Performing European Memories: Trauma, Ethics, Politics (2013) және Theory for Theatre Studies: Memory (2020) монографиялары бар. Сонымен қатар ол The Oxford Handbook of Politics and Performance (2021) ұжымдық ғылыми басылымының бірлескен редакторларының бірі. Ғалым жетекшілік ететін Thinking through the Silk Roads: Cross-Cultural Exchanges and Mobilities пәнаралық зерттеу бастамасы Жібек жолы кеңістігіндегі мәдени алмасуларды, бейнелеу өнерін, перформансты және мәдени мұраны зерделеуге бағытталған. Бұл зерттеу бағыты Қазақстанның мәдени мұрасы мен халықаралық көркем байланыстарын қарастыру тұрғысынан да өзекті.
Академиялық сапар аясында білім алушыларға дәрістер мен семинарлар өткізу, магистранттар мен докторанттарға ғылыми кеңес беру, профессор-оқытушылар құрамымен тәжірибе алмасу және бірлескен зерттеулердің бағыттарын талқылау көзделген. Кездесулерде өнерді зерттеудің пәнаралық тәсілдеріне, мәдени мұраны пайымдауға және халықаралық ғылыми ынтымақтастық мүмкіндіктеріне көңіл бөлінеді.
Профессор Милия Глуховичтің сапары Өнер факультетінің білім алушылары мен оқытушыларына театр, перформанс және визуалды мәдениет салаларындағы халықаралық зерттеу тәжірибесімен танысуға, ғылыми пікір алмасуға және жаңа академиялық байланыстар орнатуға мүмкіндік береді.