Италияның Кьети–Пескара қаласындағы «Г. д’Аннунцио» университетінің профессоры Мария Тереза Джусти Абай атындағы Қазақ ұлттық педагогикалық университетіне арнайы ғылыми сапармен келді. Сапардың мақсаты Қазақстан мен Италия арасындағы ғылыми және білім беру байланыстарын нығайту, әлеуметтік-гуманитарлық зерттеулер саласындағы халықаралық ынтымақтастықты дамыту, ғылыми және академиялық тәжірибе алмасу болды.

Профессор Мария Тереза Джусти университет басшылығымен, халықаралық ынтымақтастық департаментінің өкілдерімен, Тарих және құқық факультетінің деканы Г.К. Кенжебаевпен және факультеттің профессор-оқытушылар құрамымен кездесті. Кездесулерде ғылым және білім беру саласындағы ынтымақтастықты одан әрі дамыту, академиялық байланыстарды кеңейту және бірлескен ғылыми-зерттеу және білім беру жобаларын жүзеге асыру мүмкіндіктері талқыланды.

Италиялық маман Тарих және құқық факультетінің ғылыми-зерттеу бөлімшелерінің қызметімен, оның ішінде «Айтылған тарих» ғылыми зертханасы және «DHLab: Цифрлық тарих және білім беру» халықаралық оқу-ғылыми зертханасының жұмысымен танысты.

Ғылыми-білім беру бағдарламасы аясында факультеттің профессор-оқытушылар құрамы, докторанттар мен магистранттардың қатысуымен дөңгелек үстел ұйымдастырылып, профессор студенттерге дәрістер өткізді. Кездесулер мен пікірталастар барысында Қазақстан тарихын кеңестік және еуропалық тарих контекстінде зерттеу мәселелеріне, заманауи зерттеу тәсілдеріне және академиялық ынтымақтастық мүмкіндіктеріне ерекше назар аударылды.