Қазақстандық қоғамдық даму институтының (ҚҚДИ) Қазақстанның материалдық емес мәдени мұрасын түгендеу және құжаттандыру жобасы аясында Абай атындағы Қазақ ұлттық педагогикалық университетінің Өнер факультетінде «Дизайн», «Көркем білім» және «Музыкалық білім және хореография» кафедралары оқытушыларының қатысуымен бейнетүсірілімдер мен сұхбаттар өткізілді.

Жұмыстың негізгі мақсаты – қазақ өнерінің өміршең дәстүрлерін құжаттандыру, шеберлердің кәсіби тәжірибесін, сондай-ақ ұрпақтан ұрпаққа жалғасып келе жатқан бірегей білім мен практикалық дағдыларды сақтау.

Жобаға Өнер факультетінің педагогикалық, орындаушылық және шығармашылық қызметте көпжылдық тәжірибесі бар профессор-оқытушылар құрамы қатысты.

Ербол Тұңғышұлы Үсенбаев – Музыкалық білім және хореография кафедрасының доценті, музыка өнері және музыка педагогтерін кәсіби даярлау саласының маманы.

Ерболат Жұмашұлы Мұстафаев – профессор, Қазақстан Республикасының еңбек сіңірген қайраткері, кәсіби орындаушы және педагог.

Талант Жамбылұлы Клышбаев – Музыкалық білім және хореография кафедрасының оқытушысы, хореография өнері және би педагогикасы саласының маманы.

Алмат Мүшелбайұлы Кумаржанов – профессор, хореография режиссері, балетмейстер және педагог.

Талғат Әбілболатұлы Жанасылов – педагогика ғылымдарының магистрі, оқытушы, сәндік-қолданбалы өнер және дәстүрлі домбыра жасау шебері.

Болат Ақмолдаұлы Атамқұлов – аға оқытушы, Қазақстан Республикасы Суретшілер одағының және Қазақстан Республикасы Дизайнерлер одағының мүшесі, сәндік-қолданбалы өнер суретшісі, зергерлік өнер шебері.

Майра Сыздыққызы Нұрке – Дизайн кафедрасының доценті, философия докторы (PhD), сәндік-қолданбалы өнер және көркем білім саласының маманы.

Бағыбек Әбілқасымұлы Манасов – Өнер факультетінің оқытушысы, суретші және керамика өнері саласының маманы.

Есенкелді Үсабайұлы Күлжабаев – педагогика ғылымдарының магистрі, оқытушы және теріні көркем өңдеу шебері.

Бейнетүсірілім барысында оқытушылар өздерінің шығармашылық жолы, кәсіби тәжірибесі, дәстүрлі технологиялар мен көркемдік тәжірибелері, сондай-ақ шеберлікті жас ұрпаққа жеткізу жолдары туралы әңгімеледі.

Сұхбаттарда ұрпақтар сабақтастығына, материалдық емес мәдени мұраны сақтаудағы шебер мен педагогтің рөліне, сондай-ақ дәстүрлі өнер мен заманауи көркем білімнің өзара байланысына ерекше назар аударылды.

Жобаға қатысушылар ұлттық өнердің әртүрлі бағыттарын таныстырды. Олардың қатарында дәстүрлі музыка мен орындаушылық өнер, хореография, сәндік-қолданбалы және зергерлік өнер, ағашты, металды және теріні көркем өңдеу, ұлттық музыкалық аспаптарды жасау, керамика және көркем шығармашылықтың өзге де түрлері бар.

Жоба аясында жиналған фото-, бейне- және сұхбат материалдары материалдық емес мәдени мұраны жалғастырушы тұлғалар, олардың кәсіби тәжірибесі мен шығармашылық практикасы туралы мәліметтерді сақтауға мүмкіндік береді. Бұл материалдар алдағы ғылыми зерттеулерде, білім беру жобаларында және ұлттық мәдениетті насихаттау жұмыстарында пайдаланылуы мүмкін.

Abai University Өнер факультеті оқытушыларының Қазақстандық қоғамдық даму институтының жобасына қатысуы мәдени жадты сақтауға, көркемдік дәстүрлер сабақтастығын нығайтуға және бірегей кәсіби тәжірибені жас ұрпаққа жеткізуге ықпал етеді.